Hrafnagilsskóli

Föstudaginn 14. október fóru nemendur í 4. bekk, ásamt Huldu umsjónarkennara, út að tína rusl. Þau voru mjög dugleg og komu inn með u.þ.b. 5 kg af rusli af skólalóðinni eftir 40 mínútna tínslu. Meðfylgjandi eru nokkrar myndir frá þessum degi.

Í vor sótti Hrafnagilsskóli um Grænfánann en það er viðurkenning sem Landvernd veitir þeim skólum sem uppfylla ákveðin skilyrði í umhverfisvernd. Í síðustu viku heimsóttu okkur þau Orri Páll og Gerður frá Landvernd og gerðu úttekt á því sem við höfum unnið að í umhverfismálum. Í dag fengum við svar frá þeim og þar stóð m.a.

„Í heimsókninni til ykkar fór það ekki milli mála að þið hafið unnið vel að umhverfismálum og mikið er nú þegar orðið fast í veggjum skólans.
Nú er mikilvægt að halda áfram á sömu braut, dýpka skilninginn og þora að takast á við ný þemu auk þess að halda áfram með það sem nú þegar hefur áunnist.
Hrafnagilsskóli hefur náð þeim góða árangri að fá Grænfánann afhentan í fyrsta skipti. Innilega til hamingju með það. Þið hafið óskað eftir að fá Grænfánann afhentan 16. nóvember 2011 og verðum við að sjálfsögðu við því. „

Við erum mjög stolt af þessum áfanga og stefnum að enn frekari vinnu í umhverfismálum.

Umhverfisráð Hrafnagilsskóla

Velkomin á umhverfissíðu Hrafnagilsskóla. Hér verður hægt að nálgast upplýsingar um það helst sem við erum að gera í umhverfismálum. Síðastliðinn vetur varð Hrafnagilsskóli aðili að verkefinu ,,Á grænni grein“ sem er aðdragandi að því að fá Grænfánann. Föstudaginn 7. október n.k. koma fulltrúar frá Landvernd til að meta stöðu umhverfismála í skólanum og kemur þá í ljós hvort við uppfyllum þau skilyrði sem til þarf til að flagga Grænfánanum.